Опубликовано: 05.03.2025

Токусаров Петр Дмитриевич, Ленинград куоратын босхолооһуҥҥа сэриилэспит. «Отличный дорожник» диэн мэтээллээх. 1901 сыллаахха Ньурба улууһугар Куйбууһап диэн сиргэ төрөөбүт.
        Бөөтүккэ 92 сааһыгар тиийэ олорбут. 80 сааһын лаппа ааһыар диэри кустаан, балыктаан, бэйэтэ от охсон сылдьыбыт. Чаппанда күөлүгэр баар арыыны бары Бөөтүккэ арыыта диэн билэллэр. Кини олус хоһуун уонна уус эбит. Уус буолан сэрииттэн тыыннаах кэлбит диэн кэпсииллэр оҕолоро. Өрүһү туоруур муоста тута сырыттахтарына немецтэр самолетунан кэлэн ытыалыыллар эбит. Ону саллааттар бары Бөөтүккэ үрдүгэр саба түһэллэр үһү. Бу уус саханы буулдьа таптаҕына муостабытын кэмигэр бүтэриэхпит суоҕа диэн харыстыыллар эбит. Ол нуучча саллааттарыгар уонна хамандьыырбар олус махтанабын диэн кэпсиирэ үһү сэрии бэтэрээнэ Петр Токусаров.