Опубликовано: 03.02.2023

          Олунньу ый 1 күнүгэр биһиги интэринээт дьиэбитигэр, тэрилтэбит салайааччыта – Изамира Федосьевна, саҥа ый үүнэрин кэриэтэ биир саҥа сүүрээни киллэрдэ. Ол курдук, кини бэйэтин уус-уран оҥоһуктарынан, ол эбэтэр уу сахалыы уус-уран хайысхалаах уруһуйдарын персональнай быыстапка быһыытынан туруоран интэринээт аҕам саастаахтарын уонна үлэһиттэрин сэҥээриилэрин уонна биһирэбиллэрин ылла.

     Изамира Федосьевна өссө оскуола саастаах эрдэҕиттэн хайдах умсугуйан туран дьарыктаммытын олус итэҕэтиилээхтик кэпсээтэ. Биир ордук кэрэхсэбиллээҕэ, тыыннаах айылҕаны кытта ыкса алтыһан, кини кэрэ уобарастарын кумааҕыга сүһэн ылыыта буолар. Холобур, саха аймах биир киэн туттуута “дьөһөгөй таҥара оҕолоро ”, ол эбэтэр сылгылар оччоттон баччаҕа диэри тэһии буоланнар кэннилэрин өттүнэн ойуулукка киирбиттэр. Ол курдук бу уобарастар сахалыы халандаарынан быйылгы 2023 сыл ”Дьөһөгөй” бэлиэтэ хартыыналар ураты суолталаахтар уонна быыстапканы олус киэргэтэллэр. Итинник искусство биир чаҕылхай көрүҥнэрэ графика уонна живопись кэккэлэспиттэрэ ураты тыыннааҕымсытыы истиҥ иэйиитин үөскэтэллэр. Маны тэҥэ үһүс көлүөнэ оскуолатыгар бэртээхэй маастар кылаас уонна уруок буолла.        

          Ити курдук, тэрилтэ салайаачыта интэринээт аҕам саастаахтарыгар кэрэ эйгэтин бэйэтин үтүө холобурунан көҕүлүүрэ кэрэхсэбиллээх даҕаны, суолталаах даҕаны. Түгэнинэн туһанан интэринээт аҕам саастаахтара уонна кэлэктиибэ салайааччыбытыгар Изамира Федосьевнаҕа инникитин айар үлэтигэр ситиһиилэри баҕара хаалыллар.

       Григорий Седалищев
       В.А. Петрова аатынан Ньурбатааҕы улуустар икки ардыларынааҕы
кырдьаҕастар уонна инбэлииттэр интэринээт дьиэлэрин
культураҕа тэрийээччитэ.