Опубликовано: 26.02.2025

2025 с. олунньу 25 күнүгэр биһиэхэ Федорова Г. Д. салайааччылаах «КөмүсКэл» иистэнэр сыах волонтердара кэлэн бэйэлэрин үлэлэрин туһунан сиһилии кэпсээтилэр. «Көмүскэллэр» диэн билигин ураты ис хоһоонноох республиканскай таһымнаах уопсастыбаннай хамсааһын буолан турар. Бастаан анал байыаннай дьайыыга кытта сылдьар уолаттарбытыгар көмө буолуо этибит диэн ийэлии толкуйунан аҕыйах киһилээх түмсүүттэн саҕалаабыт буоллахтарына, билигин кэккэлэрэ кэҥээн, соруктара үрдээн улуус, республика таһымыгар дойдуга бэриниилээх буолуу үтүө холобура, иистэн саҕалаан ыччаты патриоттыы тыыҥҥа иитиигэ методическэй киин таһымыгар таҕыстылар.
Көмүскэллэр сатаабатахтара суох. Саллаат уолаттары таҥаһынан хааччыйалларын таһынан, уран иистэрин ааҕан сиппэккин. Кинилэр паннолара Ильмень күөл сиригэр тиийэ көрдөрүүгэ турбуттара элбэҕи этэр. Аны ырыалара-тойуктара, кыраҕа-кыаммакка көмөлөрө… киһи сөҕөр эрэ.
Бүгүн ДИПИ олохтоохторо кинилэри илэ көрөн, кэпсэтэн олус сэргэхсийдилэр.
Махтал «көмүскэллэргэ»