Опубликовано: 31.03.2026

Киһи күннээҕи олоҕо биир кэмник устара ардыгар сылаалаах буолар. Үүнэр күн ааспыт күнтэн тугунан эрэ уратылаах буоллаҕына ордук толору уонна көдьүүстээх буолара саарбаҕа суох. Соһуччу түгэннэр бааллара олохпутун кустук арасс өҥүнэн оонньоторго дылылар. Сэттиэлэ чөл күнүгэр сарсыардаттан Иван Ионович Дьячковскай — Кыталык Уйбаан илэ бэйэтинэн тиийэн кэлэн олохтоохтору сэргэхситтэ. Интэринээт-дьиэҕэ бастакы сырыыта буолбатах, онон олохтоохтору кытта бэрт сэргэх кэпсэтии буолла. Кини айылҕа харыстабылыгар олоҕун анаабыт киһи, уус тыллаах суруйааччы, тулалыыр эйгэ кэрэтин хаартыскаҕа үйэтитээччи быһыытынан биллэр. Аны күнүскү аһылык кэнниттэн чугас доҕорбут — Светлана Гаврильева, аҕам саастаахтарга аналлаах тарбахтары хамсатар, өйү сытыырхатар оонньуу арааһын оонньотто. Дьиэттэн ырааппат доруобуйаларынан хааччахтаах дьону аралдьытар үтүө үгэс салҕана турдаҕа буоллун. Онтон, дьэ, күнү түмүктүүр киэһээҥҥи аһылык уратылаах буолан биэрдэ. Үөһээ Бүлүүттэн төрдүлээхтэр биир дойдулаахтара ыыппыт кэһиилэрин куһу, куобаҕы, балыгы сыа-сым курдук астаан, миин буолары мииннэтэн, сороҕун соркуойдатан дьиҥ сахалыы астаах остуолу тардан үөрэ-көтө аһаатылар. Дойду аһа сыттыын минньигэс, амтанныын астык!